Ирмос: Впещь о́гненную ко отроко́м евре́йским снизше́дшаго, и пла́мень в ро́су прело́жшаго Бо́га, по́йте, дела́, я́ко Го́спода, и превозноси́те во вся ве́ки.

Халде́йское всесожже́ние и огнено́сное мне страсте́й безме́рное пла́мя Навуходоно́сор мы́сленный и лю́тую разжже́ всепаля́щую пещь, ю́же моли́тв Твоих росо́ю угаси́, Де́во.

Ум стяжа́в стра́стен и безме́стными по́мыслы оскверне́н, к Тебе́ прибега́ю, чи́стей и благоуха́нней пала́те Бо́жией, Влады́чице: очи́сти мя от вся́каго земна́го злосмра́дия.

Христо́ву Тя кни́гу свяще́нную, Ду́хом Бо́жиим ве́дый запечатле́ну, Де́во, призыва́я молю́ Ти ся в кни́зе живы́х написа́тися мне и неги́блема живота́ сподо́битися.

Предста́тельство ве́рных, наде́ждо и ра́досте оскорбля́емых, в ра́дость обрати́ плач мой, Чи́стая, и даждь ми, зане́же ны́не не зрю Тя в ве́це сем, зре́ти во о́ном.