Ирмос: Боже́ственное Твое́ разуме́в истоща́ние, прозорли́во Авваку́м, Христе́, со тре́петом вопия́ше Тебе́: «Во спасе́ние люде́й Твоих спасти́ пома́занныя Твоя́ прише́л еси́».

Удо́бь ко страстем влеку́ся, Твоея́ по́мощи обнаже́н, Дево Ма́ти Богоневе́стная, те́мже умилосе́рдися и от ро́ва изми́ мя зла́го обы́чая.

Изсуши́ти пло́ти смяте́ния помышле́нием де́тельным, Богороди́тельнице, сподо́би мя, и ума́ движе́нием в го́рних пребыва́ти благопоспе́шствуй.

Сынове Бо́жии прича́стием бы́хом, ели́цы прия́хом Христа́, аз же па́ки на проти́вная обрати́хся, зло́бою сын греха́ быв.

Пути́ спаси́тельна не обрето́х неве́жствием души́; Путь живота́ поро́ждшая, Богороди́тельнице Мари́е, спасе́ния путь ми бу́ди.