Ирмос: Согреши́хом, беззако́нновахом, непра́вдовахом пред Тобо́ю: ниже́ соблюдо́хом, ниже́ сотвори́хом, я́коже запове́дал еси́ нам; но не преда́ждь нас до конца́, отце́в Бо́же.

Ра́дуйся, хра́ме богоукраше́нный; ра́дуйся, одушевле́нный до́ме Царе́в; ра́дуйся, ко́тво ве́ры, Нескве́рная; ра́дуйся, добро́то многовожделе́нная; ра́дуйся, Всепе́тая, всех упова́ние.

Ра́дуйся, ве́рных удобре́ние; ра́дуйся, а́нгелов многослову́щее и пресла́вное чу́до и челове́ков держа́вное утвержде́ние; ра́дуйся, Безневе́стная Ма́ти, всех ра́досте.

Ра́дуйся, заре́, Со́лнце ми́ру всему́ возсия́вшая; ра́дуйся, невмести́маго Существа́ пребыва́ние све́тлое и пресла́вное; ра́дуйся, одушевле́нная трапе́зо, Хлеб жи́зни нося́щая, Всесвя́тая.

Удиви́ ми́лости Твоя́ моле́бнику Твоему́, Богороди́тельнице, покры́й мя кро́вом Боже́ственного Твоего́ заступле́ния, и сохрани́ я́ко зе́ницу о́ка, и спаси́ от стрел вра́жиих наде́ющася на Тя.