Ирмос: Его́же во́инства небе́сная сла́вят, и трепе́щут херуви́ми и серафи́ми, вся́ко дыха́ние и тварь, по́йте, благослови́те и превозноси́те во вся ве́ки.

По до́лгу Твое́, Богома́ти, моле́ние призыва́ем к Сы́ну Твоему́ вси согре́шшии и осужде́ннии, да гее́нны хода́тайством Твоим изба́вимся.

Гре́шники призва́ти прии́де покая́нием Христо́с: «Прииди́те ко Мне!»; ели́цы Сего́ слове́с отве́ргшиися есмы́, покая́нием припаде́м к Богоро́дице.

То́ки ны́не слез низпосли́ ми и воздыха́ние от души́ с сокруше́нием, я́ко да пла́мень той угашу́ нестерпи́мый и ра́йския сла́вы улучу́.

Да обожи́т челове́ки Сын Твой, Влады́чице, ви́ден бысть от Тебе́ Челове́к соверше́нный. Сего́ у́бо моли́ очище́на в коне́ц Ца́рствия Его́ показа́ти мя о́бщника.