Ирмос: Услы́шах слух Твой и убоя́хся, разуме́х дела́ Твоя́ и ужасо́хся, Го́споди.

Услы́ша Авваку́м Тя, Нескве́рная, го́ру Ду́ха, се́ньми преосия́нную, из Тебе́ бо яви́ся Бог Сло́во воплоща́емь.

Красну́ Тя и добро́тами украше́ну Жени́х обре́т, в Тебе́ всели́ся и Богоро́дицу Всечестну́ю соде́ла.

Услажда́ется правосла́вных собо́р, воспева́яй Тя я́ко Богома́терь, Всенепоро́чная, и со а́нгелом Тебе́ зовы́й: «ра́дуйся».

Прево́диши на благоволе́ние, Влады́чице, кля́тву Ада́мову, ро́ждши нам Христа́, к Нему́же вопие́м: сла́ва си́ле Твое́й, Го́споди.