Ирмос: Одея́йся све́том я́ко ри́зою, к Тебе́ у́тренюю и Тебе́ зову́: ду́шу мою́ просвети́ омраче́нную, Христе́, я́ко еди́н Благоутро́бен.

«Вся бли́жняя Моя́ добра́ и непоро́чна от Лива́на, Де́во Неве́сто»[66], Святы́м Ду́хом Ты предузна́на еси́ в Бо́жия Сло́ва воплоще́ние.

Коль красна́ бесе́да Твоя́, и вервь червле́на уста́ Твоя́[67], и́миже лобза́ла Бо́га еси́, Всесвята́я, я́ко Младе́нца руконоси́ма.

Со́лнце побежде́но бысть све́тлостию Твое́ю: Ты бо, Мари́е, не́бо свети́лами Украси́вшаго на руку́ Твое́ю держа́ла и от сосцу́ дои́ла еси́.

Неве́ста Бо́жия Всечестна́я, колесни́ца Со́лнца и Све́та прия́телище, цвет благоуха́нный и благоцве́тнейший сад, сла́ва де́вам Ты еси́, Мари́е Препе́тая.