Ирмос: Неопа́льная огню́ в Сина́и прича́щшаяся купина́ Бо́га яви́ медленоязы́чному и гугни́вому Моисе́ови, и о́троки ре́вность Бо́жия три непребори́мыя во огни́ певцы́ показа́: вся дела́ Госпо́дня, Го́спода по́йте и превозноси́те во вся ве́ки.

Тя чи́сту и све́тлу и светоно́сну пала́ту Иису́сову и слове́сное Сло́ва жили́ще, одушевле́нный киво́т, небе́с ши́ршую и вы́шшую земли́, молю́, Всечестна́я Отрокови́це: спаси́ смире́нную ду́шу мою́.

Дар от нас да́вшаяся Влады́це, я́ко нача́ток естества́, моле́ния на́ша приими́, да́ры кра́сныя воздаю́щи нам, по́мощь Твою́, да ве́рою и любо́вию покланя́емся Тебе́ и Сы́ну Твоему́ во вся ве́ки.

Преклоня́емь, я́ко Благ, Сын Твой, Своим человеколю́бием, по́мощь на враги́ и страсте́й враче́бницу Тя подаде́ ве́рою зову́щим: вся дела́, Го́спода по́йте и превозноси́те во вся ве́ки.

Яви́ся мне ны́не в беда́х предста́тельство, в напа́стех отра́да, по́мощь во обстоя́ниих, цельбовре́яй в боле́знех исто́чник и страсте́й врачева́ние, всяк вред прогоня́ющи, Богоро́дице, да сла́влю Тя во вся ве́ки.