Ирмос: Ри́зу ми пода́ждь све́тлу, одея́йся све́том я́ко ри́зою, многоми́лостиве Христе́ Бо́же наш.

Тишины́ Ро́ждшая Христа́ вино́внаго, свире́пое страсте́й волне́ние, молю Ти ся, укроти́.

Тещи́ за́поведий Бо́жиих путь се́рдце мое́, стесне́нное страстьми́, разшири́, Отрокови́це, небе́с ши́ршая.

Не стяжа́х слез пото́ки, да омы́ю безме́рная моя́ согреше́ния; моле́ньми Твоими, Чи́стая, сих мя изба́ви.

Ма́ти Вы́шняго, от страсте́й вод мно́гих в покая́ние приими́ мя, с высоты́ низпосыла́ющи благода́ть Твою́.

Седален, глас осьмый. Подобен:Прему́дрость и Сло́во:

Облаче Со́лнца у́мнаго, ума́ моего́ о́блаки те́мныя расто́ргни, Влады́чице, све́том лица́ Твоего́, и покая́ния заре́ю просвети́ о́чи мра́чныя моея́ души́, страсте́й очерне́нием ожесточе́ннеи́ и злых дея́ний му́тными сли́тии в коне́ц ослепле́ннеи, да любо́вию зову́ Ти: моли́ Христа́ Бо́га согреше́ний оставле́ние да́ти мне, Тя бо и́мам наде́жду, недосто́йный раб Твой.