Ирмос: Просвети́вый сия́нием прише́ствия Твоего́, Христе́, и освети́вый Кресто́м Твоим ми́ра концы́, сердца́ просвети́ све́том Твоего́ богоразу́мия правосла́вно пою́щих Тя.

Све́щниче златы́й, Боже́ственную Свещу́ име́яй, страсте́й моих мрак разгна́вши, Боже́ственнаго раче́ния пла́мень в се́рдце мое́м, Богороди́тельнице, разжзи́.

Многоплете́нныя ухищре́ния и кова́рства зми́я льсти́ваго, Де́во, расто́ргни, и́же на раба́ Твоего́ умышля́ет лука́вствием, я́ти мя покуша́яся.

Вознедоуме́в от вся́кия по́мощи челове́ческия, к Твоему́, Нескве́рная, скоре́йшему заступле́нию с благогове́нием притеко́х: Твоего́ промышле́ния и благоволе́ния мя сподо́би.

Зако́ннии Тя и сено́внии предъявля́ху о́брази дре́вле Богоро́дицу бы́ти Чи́стую, мы же иму́ще де́лом сих сбытие́, непреста́нно воспева́ем Тя.