Ирмос: На ка́мени мя ве́ры утверди́в, разшири́л еси́ уста́ моя́ на враги́ моя́, возвесели́ бо ся дух мой, внегда́ пе́ти: несть свят, я́коже Бог наш, и несть пра́веден па́че Тебе́, Го́споди.

Челове́ком жива́я спасе́ния две́ре, отве́рзи ми пра́вды врата́ и дверь покая́ния, я́ко да те́ми вшед, испове́дание и хвалу́ принесу́ Го́сподеви моему́.

Печа́тию мя назна́менуй и о́бразом кро́ва Твоего́ души́ моея́ на челе́, я́ко да от лица́ убегу́ лу́ка всегуби́теля, да не я́ко овча́ неназна́менное растерза́ет мя.

Образ Сы́на Твоего́ погребе́н, погубле́нную дра́хму Царе́ву, Де́во, взыска́вши и обре́тши, належа́щую персть и прах в неи́ страсте́й очи́сти и отряси́.

Ору́жием мя греха́ уя́звльшаго, Сама́, Богороди́тельнице, уязви́, ору́жие излива́ющи, и́мже ребро прободеся Сы́на Твоего, и прожени́, и в конец сокруши́ же и изсецы́.