Ирмос: Тебе́, во огни́ ороси́вшаго о́троки богосло́вившия, и в Де́ву Нетле́нну все́льшагося Бо́га Сло́ва пои́м, благоче́стно пою́ще: благослове́н Бог оте́ц на́ших.

Звезда́ Тобо́ю возсия́, Чи́стая, Иже от Иа́кова Христо́с, сотвори́вый луну́ и со́лнце в нача́ла и просвеще́ние но́щи и дне, Его́же моли́ мою́ просвети́ти ду́шу.

Го́ру Дании́л прови́де Тя, Де́во, несеко́му, от нея́же Ка́мень Христо́с кроме́ рук отсече́ся, но молю Ти ся: возми́ ско́ро ка́мень тяжча́йш ослепле́ния от се́рдца моего́.

От ко́рене Иессе́ова прозя́бши, сте́блие священнейшее, нетление верным плодопринесла́ еси́, и жи́зни Боже́ственныя Цвет, благослове́ние процвела́ еси́, изсуши́вшее кля́твы сад.

Принесла́ еси́, Чи́стая, я́ко виногра́д, живота́ Гро́зд всезре́лый, пия́нство пре́лести возрази́вый и ми́рови вино́ ра́зума источи́вый, его́же пию́ще, ве́рнии, целому́дрствуем.