Ирмос: Образ чи́стаго рождества́ Твоего́, огнепали́мая купина́ показа́ неопа́льная; и ныне на нас напа́стеи́ свире́пеющую угаси́ти мо́лимся пещь, да Тя, Богоро́дице, непреста́нно велича́ем.

Уже́ при сконча́нии бых вре́менных моих, Де́во, увы́ мне, име́ний, и отягче́н грехми́, отхожду́ в безконе́чныя ве́ки му́читися. Яже Судию ро́ждшая, Сего́ уми́лостиви мне, Влады́чице.

Зако́ны Бо́жия отверго́х и греха́ зако́ну сам порабо́тихся, зако́ну ума́ не подклони́выйся, окая́нный. Яже естества́ зако́нов утаи́вшаяся в честне́м Твое́м рождестве́, зако́ны пло́ти моея́ покори́.

Возми́ бре́мя тя́жкое мое́ прегреше́ний, Богома́ти Всенепоро́чная, и ле́гкое и́го, Чи́стая, сподо́би мя Сы́на и Бо́га Твоего́ носи́ти, и стезю́ преити́, в го́рний уде́л вводя́щу.

Да глубину́ безконе́чную щедро́т пока́жеши бла́гости Твоея́ и благоутро́бие Сы́на Твоего́ на всех и на мне согре́шшем, Всепе́тая, проще́ние ми пода́ждь и рая́ жили́ще.

Стихиры, глас первый. Подобны:Всехва́льнии му́ченицы:

Ра́дуйся, чисте́йшая Бо́гу одушевле́нная пала́то и светоно́сная; ра́дуйся, Неискусому́жная; ра́дуйся, Боже́ственный кро́ве; радуйся, стено́ неруши́мая; ра́дуйся, Бо́га неизрече́нно Ро́ждшая; ра́дуйся, Ада́мово исправле́ние и Евино избавле́ние; ра́дуйся, всех ве́рных держа́во.

Ра́дуйся, престо́ле о́гненный Бо́жий; ра́дуйся, ши́пок неувядаемый; ра́дуйся, едина Прозя́бшая Крин благово́нный; ра́дуйся Всесвята́я, Еюже изба́вихомся пе́рваго изрече́ния; ра́дуйся, пречу́дное вселенныя веселие; ра́дуйся, всех правосла́вных похвало́.

Ра́дуйся, лу́же доброцве́тный и благово́нный; ра́дуйся, виногра́де всезре́лый; ра́дуйся, плодоно́сная ма́слино; ра́дуйся, Бо́гу мироуха́нный са́де; ра́дуйся, ча́ще и присе́нная горо́; ра́дуйся, Присноде́во, благода́тей вертогра́де благообра́зный.

Ра́дости се́рдце мое́, Чи́стая, испо́лни, я́ко благоутро́бна, и слез изба́ви, Ра́дость я́ко заче́ншая, еди́на Богома́ти, и от лю́тых всех изведи́ раба́ Твоего́, молю́ся, да сла́влю Тя, да любо́вию велича́ю Тя, су́щих всех Преиму́щую.