Ирмос: Услы́ша проро́к прише́ствие Твое́, Го́споди, и убоя́ся, я́ко хо́щеши от Де́вы роди́тися и челове́ком яви́тися, и глаго́лаше: «Услы́шах слух Твой и убоя́хся, сла́ва си́ле Твое́й, Го́споди».

Кре́постию Твое́ю, Богома́ти, да обратя́тся врази́ мои вспять, лу́цы да сокруша́тся их, по́мыслы нечи́стии и скве́рнии, и даждь ми Твое́ю моли́твою слеза́ми ити́ к безстра́стию.

Плени́цами согреше́ний затяза́емь, не оставля́ю, но па́че исплета́ю нереши́мая, Богома́ти, стра́сти прилага́я на стра́сти, и быва́ю всем в кля́тву, глас проро́ч «го́ре тебе́!» привлача́яй.

Язвы души́ моея́ не престаю́ любостра́стьми стружа́яй и прилага́ю вре́дом боле́зни, пребыва́яй нечу́вственне неисце́лен; поми́луй, исцели́ и спаси́ мя мольба́ми Твоими, Богороди́тельнице.

Со́ний нестоя́тельных прю[75], дела́ жития́, на ки́йждо день преходя́щая ви́дяй, ника́коже прие́млю сих чу́вство, но па́че прильпо́х к сим, я́коже блющ[76]к ду́ба высоте́.