Ирмос: Пла́вающаго в молве́ жите́йских попече́ний, с корабле́м потопля́ема грехи́ и душетле́нному зве́рю примета́ема, я́ко Ио́на, Христе́, вопию́ Ти: из смертоносный глубины́ возведи́ мя.

Истопле́нием впад пучи́ны жите́йския посреде́, погрузи́х корабле́ц душе́вный, и погуби́х, Чи́стая, вся́кое до́брых дово́льство, но из па́губныя мя глубины́ возведи.

От мы́сленнаго зве́ря, душетле́ннаго ки́та мя изведи, Де́во, молю́ Ти ся, из чре́ва а́дова зва́ние мое́ услы́шавши; и да приидет к Тебе́, Влады́чице, моли́тва моя́; ели́ка же помоли́хся, Блага́я, возда́ждь ми.

Напа́даньми согреше́ний и прило́гми волн жите́йских обурева́ет мя и смуща́ет ве́тров противодыха́ние непреста́емых; изба́ви, Окормителя Бо́га Ма́ти, от смертоно́снаго ду́шу мою́ волне́ния.

Адовы мра́чныя земли́, земли́ тьмы, я́коже есть пи́сано, ве́чныя и несвети́мыя, иде́же несть све́та, ниже́ ви́дети живота́ челове́ческа[94], да не узрю́ аз, на Тя, Влады́чице, упова́яй.

Седален, глас седьмый.Самогласен:

Безсе́менно зачала́ еси́, Де́во Богороди́тельнице, Сы́на во утро́бе Твое́й, Бо́жие Сло́во и Отчее, Его́же непреста́нно моли́ о душа́х на́ших.