Ирмос: Отроки благочести́выя в пещи́ Рождество́ Богоро́дично спасло́ есть; тогда́ у́бо образу́емое, ны́не же де́йствуемое, вселе́нную всю воздвиза́ет пе́ти Тебе́: «Го́спода по́йте, дела́, и превозноси́те Его́ во вся ве́ки».

Ра́дуйся, небе́с ши́ршая и всех Честне́йшая небе́сных чино́в; ра́дуйся, глубино́ безме́рная и высото́ непости́жная; ра́дуйся, очистили́ще го́рняго зва́ния; ра́дуйся, Богоро́дице, ненаде́емых наде́ждо.

Ра́дуйся, горо́ Бо́жия, ту́чная, усыре́нная, несеко́мая; ра́дуйся, горни́ло растли́вшагося естества́; ра́дуйся, черте́же двою́ естеству́ соедине́ния, в Тебе́ бо ше́ствия Бо́жия зря́тся и́стинная, Де́во, во ве́ки.

Ра́дуйся, свиде́ния ски́ние и богоде́ланная скрижа́ле заве́та; ра́дуйся, глави́зно зако́на и благода́ти; ра́дуйся, проро́ков опло́т, Свята́я Влады́чице, му́чеников и апо́столов сла́во; ра́дуйся, преподо́бных де́вственное утеше́ние.