Ирмос: Росода́тельну у́бо пещь соде́ла Ангел преподо́бным отроко́м, халде́и же опаля́ющее веле́ние Бо́жие мучи́теля увеща́ вопи́ти: «Благослове́н еси́, Бо́же оте́ц на́ших».

Нощь сме́ртная мя объя́т негото́ваго, мра́чная и безлу́нная, посыла́ющи на путь о́ный дале́к и стра́шен; да спу́тствует мне ми́лость Твоя́, Де́во.

Теку́ща ра́ди и привре́менна наслажде́ния безсме́ртно му́читися и́мам, Влады́чице, и кра́ткия ра́ди стра́сти плотски́я боле́ти во огни́, но ми́лость Твоя́ да предвари́т мя.

Отводя́щии отсю́ду ну́дят, обдержа́ще мя вся́чески, душа́ же моя́ оде́яся стра́хом, смуще́ния мно́га испо́лнь, юже уте́ши, Чи́стая, Твоим настоя́нием.

Соскорбя́ща никого́же се́рдцу моему́, ниже́ утеша́юща, Влады́чице, обрето́х, дру́зи бо и зна́емии вку́пе мя ны́не оста́виша; но Ты, наде́ждо моя́, ника́коже отсту́пиши от мене́.