Ирмос: Не послужи́ша тва́ри богому́дрии па́че Создавшаго, но о́гненное преще́ние му́жески попра́вше, ра́довахуся, пою́ще: «Препе́тый отцо́в Госпо́дь и Бог, благослове́н еси́».

Превозлета́ет всяк смы́сл стра́нное рождества́ Твоего́: пло́тски бо описа́н Иже естество́м Непристу́пный и Неопи́санный, в кни́зе живо́тней рабы́ Твоя́ написа́, Богоро́дице Всесвята́я.

Глаго́лы пророковеща́нныя в Тебе́ испо́лнишася, Богоневе́сто: Украси́теля бо ми́ру ро́ждши, вся украси́ла и просвети́ла еси́, Благослове́нная Влады́чице, челове́ков спасе́ние.

Равномо́щное Отцу́ и Ду́хови Сло́во родила́ еси́, во двою́ существу́ бы́вша, Ипоста́си еди́ней, Благослове́нная Влады́чице, челове́ков спасе́ние.

Несогля́даему глубину́ разуме́ем Тя и высоту́ неизглаго́ланну, Де́во Ма́ти, естество́ на́ше Боже́ственным возвы́сившая Твоим рождество́м, Благослове́нная Влады́чице, челове́ков спасе́ние.