Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́; вся бо твори́ши, Христе́, то́кмо е́же хоте́ти, Тя превозно́сим во вся ве́ки.

Ви́димо о́бразу Твоему́ предстоя́й, неви́димо мню, Ма́ти Живота́, Тебе́ живе́й предстоя́ти, со стра́хом моля́ся: неви́димых враг и ви́димых мя изба́ви.

Моле́ние, Де́во, Бо́гу принеси́, ду́ши на́ша спасти́, и страсте́й вины́ нас изба́вити, и де́монов зле́йша наве́та.

Греха́ раздра́вши вре́тище мра́чное, спасе́нием мя облецы́ и весе́лием и́стинным препоя́ши, да Тя сла́влю, Чи́стая, во вся ве́ки.

Бе́здно состра́стия безконе́чная, благоутро́бия мо́ре безме́рное, гре́шников гото́вая по́моще, спаси́ мя, Де́во, неключи́маго раба́ Твоего́.