Ирмос: Тебе́ Вседе́телю в пещи́ о́троцы, всеми́рный лик спле́тше, поя́ху: «Дела́ вся́кая, Го́спода по́йте и превозноси́те во вся ве́ки».

Прииди́те, Чи́стую Де́ву и Богоро́дицу воспои́м, Боже́ственная глаго́люще пе́ния: ра́дуйся, упова́ние ми́ра и заступле́ние превознося́щим Христа́ во ве́ки.

Ри́зу Христо́ви от де́вственных крове́й, Мари́е, истка́ла еси́ во́лны[68]му́жеския кроме́, ю́же Бог поноси́в, Челове́к показа́лся есть, Его́же превозно́сим во ве́ки.

«Земля́ еси́, и в зе́млю по́йдеши, я́ко зе́млен»[69], да не услы́шу ктому́: к небесе́м бо мя от земли́ возвела́ еси́, Де́во, зане́ Иже от земли́ родонача́льника нам Сотво́ршаго родила́ еси́.

Святы́й плод от ко́рене Иоаки́мова и утро́бы Аннины прозябла́ еси́, Ма́ти Бо́жия; те́мже мир Исто́чником ми́лости богате́ет и немощству́ющии припложа́ют здра́вие.