Ирмос: От но́щи у́тренююща, Человеколю́бче, просвети́ молю́ся, и наста́ви и мене́ на повеле́ния Твоя́, и научи́ мя, Спа́се, твори́ти во́лю Твою́.

Вознесы́йся горды́нею, падо́х греха́ паде́нием лю́тым, сокруша́ющим ду́шу мою́, и кто воздви́гнет мя, а́ще не Ты, Богома́ти?

Терпе́ние, Влады́чице, да́руй ми вся́кия тесноты́ и я́же от внеу́ду зол внеза́пу напа́дающих, малоду́шен бо есмь и мзды лиша́юся.

От собла́зн чужда́го изба́ви мя, от вся́каго преще́ния и вне́шния тьмы, на Тя, Всепе́тая, неукло́нно наде́жду возло́жша.

По́мыслы блу́днии возмуща́ют, Всенепоро́чная, окая́нную ду́шу мою, и препира́ют безу́мно им сосложи́тися, от ни́хже изба́ви мя ско́ро.