Ирмос: Его́же во́инства небе́сная сла́вят, и трепе́щут херуви́ми и серафи́ми, вся́ко дыха́ние и тварь, по́йте, благослови́те и превозносите во вся ве́ки.

Свяще́ннейшими гла́сы Тя ве́рнии почеству́ем, с Гаврии́лом немо́лчно зову́ще: ра́дуйся, Ма́ти Госпо́дня; ра́дуйся, предста́тельство оби́димых.

Воистинну превьшши всех тва́рей, Честна́я, была́ еси́, я́ко Творца́ сих поро́ждшая; сего́ ра́ди, веселя́щеся, непреста́нно зове́м Ти: ра́дуйся, Благослове́нная.

От всех скорбе́й и напа́стей, от вся́каго искуше́ния, неду́га и гне́ва Бо́жия изба́ви те́пле взыска́ющих покро́ва Твоего́, Де́во, я́ко да благода́рне пое́м Тя.

Облак мно́гих собла́зн обы́де ду́шу мою́, но я́ко Блага́я спаси́ мя, Бо́га и Спа́са ро́ждшая, и ве́чныя му́ки изба́ви.