Ирмос: Чу́да преестественнаго росода́тельная изобрази пещь о́браз: не бо я́же прия́т пали́т ю́ныя, я́ко ниже́ огнь Божества́ Де́вы, в ню́же вни́де, утро́бу. Тем воспева́юще воспое́м: да благословит тварь вся Го́спода и превозно́сит во вся ве́ки.

Ра́дуйся, преиму́щая го́рних еди́на во́инств, Всенепоро́чная Дево; ра́дуйся, Пречу́дная; ра́дуйся, покро́ве земноро́дных; ра́дуйся, мо́сте, к жи́зни безсме́ртней преводя́й челове́ки, поющия: да благослови́т тварь вся Го́спода и превозно́сит во вся ве́ки.

Ра́дуйся, Де́во Ма́ти, Све́та Непристу́пнаго Боже́ственное жили́ще; ра́дуйся, страно́ благопло́дная, Клас Боже́ствен я́ко вои́стинну израсти́вшая и пита́ющ вся́ческая, Ему́же вси вопие́м: да благослови́т тварь вся Го́спода и превозно́сит во вся ве́ки.

Чу́да преесте́ственнаго се коне́ц: Де́ва ражда́ет Челове́ка бы́вша всех Соде́теля, Собезнача́льна Отцу́ и Ду́хови, Ему́же вси веселя́ще ся зове́м: да благослови́т тварь вся Го́спода и превозно́сит во вся ве́ки.

Спасти́ восхоте́в, я́ко Благоде́тель, естество́ челове́чо, Созда́вый вся Сло́вом всего́ мя понесе́, весь мне всему́ соедини́вся от Де́вы воплоти́выйся Пресу́щный, Ему́же вси игра́юще зове́м: да благослови́т тварь вся Го́спода и превозно́сит во вся ве́ки.