Ирмос: Бо́га челове́ком невозмо́жно ви́дети, на Него́же не сме́ют чи́ни а́нгельстии взира́ти; Тобо́ю же, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и Тя ублажа́ем.

Страсте́й волне́ние смуща́ет мя и в сласте́й погружа́ет про́пасть, Всенепоро́чная. Яже Окорми́теля Христа́ ро́ждшая, ру́ку по́мощи мне простри́ и спаси́ мя, еди́на ве́рных спасе́ние и обновле́ние.

При́сно покро́ву Твоему́ и заступле́нию руково́дствующу спребыва́ти ми испроша́ю, Влады́чице, изря́дно же в час суда́ и исхо́да, егда́ мра́чный де́монов полк лука́вых на мя соста́вится.

Пе́щнаго мя стремле́ния измени́ и чи́сте умо́м безве́щным в нощи́ и во дни Тя содержа́ти пода́ждь, Богома́ти, наде́жду мою и свет, сла́дость, живо́т и весе́лие.

Прие́м от Тебе́, Христе́, Твоея́ благода́ти бога́тство, блу́дно то расточи́х, прилепи́хся же обнища́вый гра́жданом злым, любостла́стным словесе́м и дея́нием; но мольба́ми Ма́тере Твоея́, уще́дрив, спаси́ мя.

Стихиры, глас шестый. Подобны:Тридне́вен воскре́сл еси́:

Ра́дуйся, живота́ сокро́вище; ра́дуйся, све́щниче всезлаты́й; ра́дуйся, ста́мно, Ма́нну нося́щая всех Царя́ Христа́; ра́дуйся, Чи́стая Де́во, дре́вния кля́твы разреше́ние.

Ра́дуйся, Це́ркве честны́я сто́лпе незы́блем; ра́дуйся, еди́но предста́тельство ве́рных;

ра́дуйся, ми́ра сла́во, Преблагослове́нная; ра́дуйся, челове́ков прибе́жище.

Ра́дуйся, светлоплодови́тая я́блонь, из нея́же прозябе́ Яблоко Боже́ственное и всеблагоуха́нное, Чи́стая; ра́дуйся, шипе́ц[80]сла́дкии́ червле́ный, Де́во; ра́дуйся, покро́ве душ на́ших.

Беда́ми и скорбьми́ содержи́ма раба́ Твоего́, Богоро́дице, не пре́зри, Блага́я, но уще́дри и спаси́, ненаде́жных наде́ждо, и лю́тых мя свободи́.