Ирмос: Го́споди, Бо́же мой, от но́щи у́треневав, Тебе́ молю́ся: пода́ждь ми оставле́ние прегреше́ний моих и к све́ту Твоих повеле́ний пути́ моя́ напра́ви, молю́ся.

Реко́ша Боже́ственная и самойстинная уста́, я́ко лжец еди́н диа́вол есть; убежи́м у́бо лжи, да проше́ньми Всечи́стыя ча́да и́стины бу́дем.

Рече́ Христо́с Петру́: «Се́дмьдесят крат седмери́цею подава́й проще́ние согреша́ющим», мне же, Богоневе́стная, моли́ про́чее прости́ти, егда́ я́ко Судии́ Сему́ предста́ну.

Сво́йственная Влады́чня суть благосты́ня, ми́лость, благоутро́бие: ще́дрит я́ко Благоутро́бен, проща́ет грехи́ я́ко Ми́лующ, и промышля́ет я́ко Благ о е́же спасти́ся всем, Богома́ти.

Влады́чице Богоро́дице, вопло́щшая Творца́ моего́, и Соде́теля ро́ждшая, не оста́ви мя, и заступле́ния Твоего́ дале́че не отосли́, молю Ти ся.