Ирмос: Небе́снаго кру́га Верхотво́рче Го́споди, и Це́ркве Зижди́телю, Ты мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколюбче.

Пресла́вный гра́де и слове́сный, Влады́чице, Всецаря́ моли́, Богора́дованная, Вы́шняго Гра́да мя жи́теля бы́ти, и не посрами́ мене́ от упова́ния моего́.

Прибе́жище ми́ра, христиа́н похвали́, покро́в и заступле́ние всех на Тя упова́ющих, поко́ршася Тебе́ не пре́зри мя, но ми́лостию Твое́ю спаси́, Влады́чице.

Неча́яние и мрак, вку́пе и помышле́ний смяте́ние рождество́ Твое́ сказу́ющих покрыва́ет, Влады́чице: Его́же бо Моисе́й прови́де, мра́ком кры́емый, Сего́ родила́ еси́.

От свяще́ннаго рая́ и живо́тныя страны́, бра́шном мя улови́в льсти́вым, змий лука́вый дале́че изгна́, и ме́сто Еде́мле в тле́ния ме́сто измени́ти за́вистию уклони́.