Ирмос: Христо́с моя́ си́ла, Бог и Госпо́дь, честна́я Це́рковь боголе́пно пое́т взыва́ющи, от смысла чи́ста, о Го́споде пра́зднующи.

Тече́ние ми да́руй слез, Влады́чице, я́ко да омы́ю скве́рну души́ и обря́щу, окая́нный, ю́же погуби́х добро́ту сове́том змии́ным.

Бо́же благоутро́бне, Христе́ Человеколю́бче, Воли́телю ми́лости, ны́не на мне окропи́ ми́лость Твою́, мо́лит Тя наде́жда и предста́тельство мое́ и Ма́терь Твоя́.

Мене́ блу́днаго, па́че всех челове́к прогне́вавша Сы́на Твоего́, ве́чнующих изба́ви муче́ний, еди́на наде́ждо ве́рных, Богороди́тельнице.

Па́жить сме́рти уста́вила еси́, Ро́ждшая Живо́т всех, те́мже и мене́ умерщвле́на грехми́, оживи́ и ве́чныя жи́зни сподо́би.