Ирмос: Впещи́ Авраа́мстии о́троцы перси́дстей, любовию благоче́стия па́че, не́жели пла́менем опаля́еми, взыва́ху: «Благослове́н еси́ в хра́ме сла́вы Твоей, Го́споди».

Яко огнено́сная су́щи и богоприе́мная купина́, попали́ те́рние помышле́ний лука́вых, Чи́стая; ду́шу мою́ озари́ и смысл, бе́здну же страсте́й изсуши́.

Вели́чествие от ве́ка еди́на и Боже́ственную сла́ву я́ве обрела́ еси́ на земли́, не́бо второ́е я́влыиися; Ты у́бо потреби́ велехва́льныя враги́ моя́ де́моны.

Боже́ственный окри́не благоутро́бия и бла́гости, источи́ мне оби́льно бога́тство Твоих щедро́т, и скве́рну согреше́ний моих омы́вши, пло́ти угаси́ раждеже́ние[48].

Еже от Бо́га ми да́нное бога́тство духо́вное, пре́жде блу́дно вы́ну живы́й, сластьми́ теле́сными изнури́х, но я́ко блу́днаго, Твоими моле́нии, Де́во, мя оправди́.