Ирмос: Не тле́ния искуше́нием ро́ждшая и Всехитрецу́ Сло́ву плоть взаимода́вшая, Ма́ти Неискусому́жная Де́во Богоро́дице, прия́телище Нестерпи́маго, село́ Невмести́маго Зижди́теля Твоего́, Тя велича́ем.

Не лише́на сокро́вища де́вства Твоего́, Неве́сто Неискусому́жная, Ма́ти по пло́ти яви́лася еси́ Вседержи́теля, воспитова́ющи, я́ко Младе́нца, мир Пита́ющаго и Освяща́ющаго.

Незаходи́маго Со́лнца сла́вы всесве́тлый восто́че, от Нея́же преозари́хомся вси све́том ра́зума, господоимени́тая Отрокови́це, свет о́чию мое́ю, не пре́зри мя, моле́бника Твоего́.

Любогрехо́вен сый трепе́щу, и убоя́хся, да не ка́ко коне́ц жития́ внеза́пу пости́гнет мя; Нескве́рная Де́во, предста́тельство всех оби́димых, покая́ния образми́ удобри́тися мне ны́не помоли́ся.

Грехо́в хла́дом мя измерза́юща, благоутро́бия Твоего́ теплото́ю огре́й, и к любле́нию те́плому Сы́на Твоего́ возста́ви, я́ко да те́плым се́рдцем велича́ю Тя те́пле, раб Твой.

Стихиры, глас седьмый. Подобны:Не ктому́ возбраня́еми есмы:

Ра́дуйся, Боже́ственный кро́ве и предста́тельство чту́щих Тя, я́ко Вы́шняго Бо́га Ма́терь; ра́дуйся, Всенепоро́чная.

Ра́дуйся, Еюже ад умертви́ся и смерть упраздни́ся, Богороди́тельнице, и Ада́м спасе́ся.

Ра́дуйся, ве́рных похвало́, Всесвя́тая, ра́дуйся, Влады́чице, Бо́га пло́тию ро́ждшая.

Воздыха́юща мя приими́, я́ко Ми́лостив, и поми́луй, я́коже мытаря́, Ма́тере Твоея́ мольба́ми.