Ирмос: Ты моя́ кре́пость, Го́споди, Ты моя́ и си́ла, Ты мой Бог, Ты мое́ ра́дование, не оста́вль не́дра Отча и на́шу нищету́ посети́в. Тем с проро́ком Авваку́мом зову́ Ти: си́ле Твое́й сла́ва, Человеколюбче.

Ты струю́ исцеле́ний источи́ла еси́, бе́здну неду́г изсуши́вшую и подаю́щую ту́не кре́пость боля́щим и злостра́ждущим здра́вие. Те́мже уму́чена лю́тыми боле́зньми и го́рькими неможе́нии мя исцели́.

Да Твоя́ возвещу́ чудеса́, Богоро́дице, и вели́чия Твоя́, да испове́м в сыне́х челове́ческих, Всепе́тая, Твоя́ ми́лости, при́зри благоутро́бно на мя боле́знующа и здра́вие соверше́нное ми да́руй.

Измене́ние немощству́ющих, здра́вие удо́бное и цельба́, преложе́ние и отра́да су́щим в печа́лех, напа́стех и ско́рбех, неду́ги горча́йшими и непреста́емыми труды́ иждива́ема мя уще́дри, Влады́чице.

Немощно́е существа́ челове́ча, Христе́, понесы́й ра́ди бла́гости, не́мощи моя́ мно́гая и боле́зни ми́лостивно исцели́, Благоутро́бне; на сие́ моля́щуюся чи́сто Тя ро́ждшую стяжа́х Нескве́рную Богома́терь.