Ирмос: Образу злато́му на по́ле Деи́ре служи́му, трие Твои о́троцы небрего́ша безбо́жнаго веле́ния, посреде́ же огня́ вве́ржени, ороша́еми поя́ху: «Благослове́н еси́, Бо́же оте́ц на́ших».

Бо́га чи́стое и нескве́рное, Де́во, жили́ще, храм Ду́ха Всесвята́го мя сотвори́, верте́п бы́вша разбо́йник нечи́стых, да любо́вию вопию́: благослове́н Плод Твоего́ чре́ва.

Яко ве́щно мое́ обре́т се́рдце, враг умертви́, но си́лою Боже́ственною мя облецы́ и победи́ти сего́ сподо́би, да ве́рою вопию́: благослове́нна Бо́га пло́тию Ро́ждшая.

Иже дре́вле ю́ноши три из пе́щи горя́щия, Христе́ Сло́ве мой, изба́вивый, Сам и мене́ мольба́ми Неискусобра́чныя Ма́тере Твоей, пла́мене, его́же разжего́х, зол безме́рных моих изми́ и спаси́.

Се, Чи́стая, земноро́дных все естество́ славосло́вит Тя, та́йне чудя́щеся Твоего́ рождества́, и ра́достию взыва́я из Тебе́ Возсия́вшему: благослове́н еси́, Бо́же оте́ц на́ших.