Ирмос: Яже пре́жде со́лнца Свети́льника Бо́га возсия́вшаго, пло́тски к нам прише́дшаго, из боку́ Деви́чу неизрече́нно воплоти́вшая, Благослове́нная Всепе́тая, Тя, Богоро́дице, велича́ем.

Иже безпло́тная существа́ я́ко Бог Поста́вивый, из Тебе́, Свята́я Отрокови́це, воплоти́лся есть; те́мже от привозста́ния изми́ теле́сных страсте́й и мудрова́нии́ плотски́х моле́бника Твоего́ мольба́ми Твоими.

Пра́вды Со́лнца, Де́во, Христа́ возсия́ла и не́бо яви́лася еси́ светле́йшее; те́мже нощь страсте́й Твоими луча́ми разори́, и ду́шу мою́ просвети́, и се́рдце уясни́.

Идеже пра́ведных собо́р, во гла́се ра́дования всели́т ми ся тогда́ недосто́йному сподо́би, презира́ющи мно́жество зол моих, я́ко Взе́мшаго ми́ра грех млеко́м Пита́вшая.

Суди́, Богоро́дице Мари́е, и разсуди́ лю́таго супоста́та, и сего́ отмщения мя изба́ви: Судию́ бо Блага́го и Пра́веднаго родила́ еси́, Иже в ме́рилех Божества́ осуди́вша смерть.

Разори́ла еси́ Евы печа́ль, Ада́ма Но́ваго ро́ждши, Иже естество́ Ада́мле прежде созда́л есть; темже и моих согрешений рукописа́ние раздери́, от искушений же, страстей и скорбей свобожда́ющи.

Стихиры, глас вторый. Подобны:Егда́ от дре́ва:

Ра́дуйся, Вы́шняго Бо́га Ма́ти и Дево, и покро́ве к Тебе прибега́щих; ра́дуйся, всех арха́нгел Цари́це, Чи́стая; ра́дуйся, Влады́чице, небесными и земны́ми еди́на облада́ющи я́ко Цари́ца вои́стинну; ра́дуйся, царей ро́ге; всех веных, ра́дуйся, сла́во и Христиа́ном прибежище.

Ра́дуйся, та́инства стра́шнаго и недоразуме́емаго, Дево, Божественное явление; ра́дуйся, всезлата́я ста́мно; ра́дуйся, всесла́дкии́ раю́; Ада́мова, ра́дуйся, Дщи и Содетеля моего́ Ма́ти Неискусобра́чная, Благословенная, Чи́стая; ра́дуйся, и́же к Тебе́ прибега́щих похвало́ и стено́ неруши́мая; ра́дуйся, оскорбля́емых утеше́ние.

Ра́дуйся, ка́меню Бо́жии́ драги́й, всех драги́х ка́мений преиму́щий; ра́дуйся, светле́йший Царя́ Христа́ би́сере; ра́дуйся, одушевле́нный сосу́де каменозлатоблиста́ющ, Богороди́тельнице Нескве́рная; ра́дуйся, многоце́нная у́тварь Ду́ха Свята́го, честне́йших, Де́во, Честне́йшая.

Гряди́, окая́нная душе́, припади́ Ма́тери Христа́ Твоего, слезоточа́щи те́пле, разреше́ния грехе́в твоих и лю́тых туги́[29]испроша́ющи, и вопию́щи: Отрокови́це Всенепорочная, предвари́ и изба́ви мя от вся́кия му́ки, вся́каго преще́ния душепа́губна, вся́каго треволне́ния же и боле́зни и от вра́г, всу́е борю́щих мя.