Ирмос: Триста́ты кре́пкия, Рожда́йся от Да́вы, безстра́стия во глубине́ души́ трича́стное потопи́, молю́ся, да Тебе, я́ко в тимпа́не, во умерщвле́нии телесе́ побе́дное воспою́ пе́ние.

Пресве́тлая свеще́ Со́лнца сла́вы, души́ моея́ огнь, при́сно нераде́нием угаша́емь, возжзи́, Боже́ственных дел еле́ом, Пречи́стая, напоя́ющи, да ве́рою и любо́вию сла́влю Тя.

Окропи́вши, Честна́я, покая́ния иссо́пом оскверне́нную ду́шу мою́, очи́сти ско́ро, и слеза́ми омы́вши, убели́ па́че сне́га, у́мное весе́лие ми слы́шано сотво́рши и ра́дование.

Град Бо́га Всецаря́, богоприя́телище благочести́вое, сосу́де честны́й, Всенепоро́чная Богоро́дице, соблюди достоя́ние Твое́, при́сно Тя благохва́лящее и ве́рою чту́щее Твое́ Рождество́.

Блаже́ни лю́дие сла́вящии Тя Богома́терь нело́жну, и при́сно блажа́щии Тя, Нескве́рная, я́коже прорекла́ еси́ священнопроро́чествующи, егда́ Христа́ внутрь носи́ла еси́.