Ирмос: Ужасе́ся о сем не́бо, и земли́ удиви́шася концы́, я́ко Бог яви́ся челове́ком пло́тски, и чре́во Твое́ бысть простра́ннейшее небе́с. Тем Тя Богоро́дицу а́нгелов и челове́к чинонача́лия велича́ют.

Престо́л Влады́чень высо́к, седа́лище Христо́во пресла́вное, честны́й черто́же, всезлато́е святи́лище, богоприе́мный дом, Всецари́цу Мариа́м, сла́ву а́нгелов, челове́ков спасе́ние, вси ве́рнии возблагохва́лим.

Всех Царя́ и Творца́ заче́нши, родила́ еси́, Де́во, и ны́не се, ели́ка у́бо Цари́ца одесну́ю Сего́, Чи́стая предстоиши! Те́мже молю́ Тя: ча́сти шу́ия в час су́дный изба́ви мя и десны́м Его́ овца́м сочини́.

От цве́тник безпло́тных души́ цвет пе́ний объя́в и слез моих струе́ю смеси́в, огне́м серде́чным возгре́ях, Влады́чице, и ми́ро состро́ив песнь, я́ко блудни́ца нескве́рнеи но́зе Твои сим омыва́ю, зовы́й: спаси́ мя.

Спаси́телен бу́ди ми, Нескве́рная, столп, де́монским запреща́яй полко́м, напа́стей и искуше́ний тьму отгоня́яй, страсте́й же нахо́ды отрева́яй дале́че, свобо́ду чи́стую и Боже́ственных подая́й дарова́ний оби́лие.

Стихиры, глас осьмый. Подобны:О, пресла́внаго чудесе́:

Ра́дуйся, исто́чниче живото́чный; ра́дуйся, клеще́ у́мная, Боже́ственный и негаси́мый во чре́ве нося́щая Его́же ви́де Иса́ия Угль, ми́ра всего́ отме́щущ грехи́; ра́дуйся, пресла́вное слы́шание и глаго́лание; ра́дуйся, честно́е жили́ще Бо́жие и горо́ свята́я.

Ра́дуйся, Де́во Всенепоро́чная; ра́дуйся, живота́ сокро́вище; ра́дуйся, горо́ присе́нная; ра́дуйся, сто́лпе о́гненный и пресве́тлый о́блаче; скве́рны вся́кия, ра́дуйся, очище́ние; ми́ра, ра́дуйся, обновле́ние; ра́дуйся,Неневе́стная; ра́дуйся, Ма́ти Пречи́стая; ра́дуйся, пла́мень угаси́вшая рождество́м Твоим; ра́дуйся, всех наде́ждо.

Ра́дуйся, чистоты́ сокро́вище; ра́дуйся, Све́та чи́стое и я́сное пребыва́ние; всезлата́я, ра́дуйся, ста́мно и пала́то одушевле́нная, престо́ле Царе́в огнезра́чный; ра́дуйся, Благослове́нная и Неискусому́жная; ра́дуйся,Всенепоро́чная; ра́дуйся, ве́рных прибе́жище; ра́дуйся, Нескверная; ра́дуйся, Богославнеишая; ра́дуйся, всех ра́досте.

Те́ло, ду́шу и дух мой все́ми лютыми окая́нно делесы́ окаля́х: те́ло у́бо сту́дным страсте́м предая́й, ду́шу же всем лука́внейшим начина́нием, с ни́миже пожи́х, дух а́бие превознося́щимися обы́чаи и стро́потным мудрова́нием, от ни́хже мя, Влады́чице, свободи́.