Ирмос: Твоя́ победи́тельная десни́ца боголе́пно в кре́пости просла́вися; та бо, Безсме́ртне, я́ко всемогу́щая, проти́вныя сотре́, изра́ильтяном путь глубины́ новосоде́лавшая.

Уста́ моя́ испо́лни, Чи́стая, Божественныя хвалы́, я́ко да воспою́ Твою́ сла́ву, Всепе́тая, и велича́ю на всяк день велелепие че́стно Тя Возвели́чившаго.

Да́руй ми плач веселия и утешения Божественнаго вино́вен, ра́досте и уте́хо правосла́вных, Богоро́дице Влады́чице, ра́дование ми́ру и спаса́ние источи́вшая.

Яко одушевле́нное но́вое небо, пра́вды возсия́ла еси́ Со́лнце, Отрокови́це, и прозябла́ еси́, я́ко слове́сный и та́йный рай, Дре́во живоно́сно, от Него́же яду́ще не умира́ем.

Превы́шши была́ еси́, Чи́стая, тва́рей, Бо́га вопло́щшая, те́мже молю́ся: от страсте́й гное́ния мя возста́ви и к Боже́ственней высоте́ безстра́стия возведи́.