Ирмос: Го́ру Тя благода́тию Бо́жиею приосене́нную, прозорли́выма Авваку́м усмотри́в очи́ма, из Тебе́ изы́ти Изра́илеву провозглаша́ше Свято́му, во спасе́ние на́ше и обновле́ние.

О, чуде́с Твоих, Неискусобра́чная Влады́чице! Поне́же Хода́таица челове́ком гре́шным ко Иже от Тебе́ Рожде́нному была́ еси́, те́мже и мене́, па́че всех сме́ртных согреши́вша, примири́тися Ему́ умоли́.

Умертви́, Де́во, пло́ти моея́ мудрова́ние и страсте́й прило́ги, и бесо́в сове́ты безде́льны сотвори́, и живота́ стезя́ми ходи́ти наста́ви, Живо́т всех поро́ждшая.

Слеза́ми очи́стити скве́рны се́рдца моего́ предста́тельствы честны́х а́нгел сотвори́, Чи́стая, и души́ омраче́ние, ума́ же уклоне́ния воззови́ и к безстра́стия стези́ напра́ви.

Мысль помышле́ньми сту́днейшими оскверни́х и ду́шу сластьми́, я́же при Но́и бы́вшия превзыдо́х лю́тыми безме́стии. Те́мже вопи́ю: Богороди́тельнице, уще́дри и от пото́па у́мнаго мя спаси́.