Ирмос: Недоуме́ет всяк язы́к благохвали́ти по достоя́нию, изумева́ет же ум и преми́рный пе́ти Тя, Богоро́дице; оба́че Блага́я су́щи, ве́ру приими́, я́ко любо́вь ве́си Боже́ственную на́шу, Ты бо христиа́н еси́ предста́тельница, Тя велича́ем.

Тя благословя́т горе́ безпло́тных чи́нове и воспева́ют, Всепе́тая, челове́ков мно́жества до́лу; земля́, не́бо и мо́ре пою́т всесли́чно о́бщим согла́сием песнь всеми́рную, «ра́дуйся» Ти вопию́ще весе́лием, Богороди́тельнице.

Ра́дуйся, одушевле́нная купино́ и всесвята́я горо́; ра́дуйся, всезлата́я ста́мно и Боже́ственная трапе́зо, Всецари́це Мари́е; ра́дуйся, та́инственный о́блаче и о́гненный сто́лпе; ра́дуйся, ми́рови мо́сте и небе́сная ле́ствице; ра́дуйся, прибе́жище и предста́тельство песнопою́щих Тя.

Всяк слух и ум диви́тся отню́д рождества́ Твоего́ преесте́ственеи́ та́йне, Нескве́рная́: ка́ко Ма́ти ку́пно и Де́ва была́ еси́, и Де́ва по рождестве́ пребыва́вши неискусому́жна, Чи́стая? Те́мже Тя Богоро́дицу вси госпо́дственне сла́вим.

Песнь Боже́ственну, Отрокови́це, настоя́щую приими́, воздаю́щи благода́ть и́же на Тя наде́жду возло́жшим, и ми́ру Це́рквам при́сно пода́тися испроси́, царе́м побе́де и одоле́нию ве́рным, да христиа́н всяк язы́к Тебе́ велича́ет.

Стихиры, глас вторый. Подобны:Егда́ от дре́ва:

«Ра́дуйся» вся тварь Тебе́ вопие́т: ра́дуйся, Всесвята́я Де́во; ра́дуйся, ски́птре Дави́дов; ра́дуйся, Израсти́вшая Грозд всезре́лый; ра́дуйся, две́ре небе́сная и неопали́мая купино́; ра́дуйся, све́те всеми́рный; ра́дуйся, а́нгелов ра́досте; ра́дуйся, апо́столов сла́во; му́чеников, ра́дуйся, му́жество и по́стников Боже́ственное наслажде́ние.

Ра́дуйся, горо́ вои́стинну высо́ка, горо́ несеко́ма, горо́ присе́нна; ра́дуйся, горо́ ту́чная, я́ко пое́т Дави́д; ра́дуйся, Де́во, Госпоже́ всея́ тва́ри; ра́дуйся, ору́жие необори́мо на ва́рвары враги́; ра́дуйся, обличе́ние вся́каго наве́та бесо́вска; ра́дуйся, прибе́жище рабо́м Твоим.

Ра́дуйся, любве́ сугу́быя широто́ неизме́рная и глубино́ безконе́чная Боже́ственнаго воплоще́ния, высоте́ недомы́слимая пронарече́ния Бо́жия, долготе́ преве́чная, Де́во Честна́я; ра́дуйся, кра́ю вои́стинну до́браго упова́ния и́же в океа́не жите́йстем пла́вающим.

Возста́ви мя па́дшаго люте, низве́ржена и потопля́ема, предвари́ и изба́ви озлобле́ния, да не постыди́шися и не отри́неши от лица́ Твоего́. Где бо обра́щу, окая́нный, ино́е предста́тельство, ра́зве Тебе́? Влады́чице ми́ра, не пре́зри мя.