Ирмос: Отча не́дра не оста́вль, и соше́д на зе́млю, Христе́ Бо́же, та́йну услы́шах смотре́ния Твоего́ и просла́вих Тя, еди́не Человеколю́бче.

Богоизбра́нну еди́ну от всех родо́в пре́жде вся́кия тва́ри, естества́ удобре́ние, цвет честны́й, Де́ву Отрокови́цу воспоим.

Просвеще́ние и сла́дость на Тя упова́ющих, ра́дости многоболе́зненное мое́ се́рдце испо́лни, подаю́щи сего́ проше́ния.

Ма́ние Твое́ яви́, Блага́я, на рабе́ Твое́м, наде́ющемся на Тебе́ от души́ и призыва́ющем Тя, всех наде́жду и похвалу́.

Неве́сто Бо́жия, приими́ мольбы́ моя́, и от вся́кия ско́рби, наве́та же, озлобле́ния и напа́стей изба́ви любо́вию пою́ща Твое́ рождество́.