Ирмос: Неопа́льная огню в Сина́и прича́щшаяся купина́ Бо́га яви́ медленоязы́чному и гугни́вому Моисе́ови, и о́троки ре́вность Бо́жия три непребори́мыя во огни́ певцы́ показа́: вся дела́ Госпо́дня, Го́спода по́йте и превозноси́те во вся ве́ки.

Нов небе́сный показа́лася еси́, Богоро́дице, и слове́сный рай, одушевле́нный дом честны́й и свяще́нный, пала́та чи́стая, храм пресла́вный Иису́са Царя́, Сего́ во чре́ве Твое́м вмести́вши нетесновме́стно, Дево, небе́с простра́ннейшая.

Ви́дите, лю́дие, и пра́ведно почуди́теся, и «ди́вна», возопии́те, «вои́стинну вся дела́ Бо́жия!»: Де́вы бо на рука́х Его́же не вмеща́ет не́бо, содержи́тся я́ко Младе́нец, де́ло руки́ Своея́ исхи́тити хотя́й из руки́ наси́льствующия руко́ю всеси́льною.

Яви́лася еси́, Чи́стая, киво́т и мирополо́жница, свяще́ние у́мное избра́нно и многоце́нно, и Ми́ро, е́же не челове́ческим ухищре́нием и худо́жеством, но еди́нем Отца́ хоте́нием и Ду́ха Свята́го наи́тием состро́ено бысть, досто́йно вмести́вшая.

Неопа́льный Огнь ро́ждши, соблюла́ся еси́ чиста́, Отрокови́це Всепе́тая; сего́ ра́ди с ли́ки святы́х моли́ Его́же родила́ еси́ ве́рным спасти́ся, поющим: вся дела́ Госпо́дня, Го́спода по́йте и превозноси́те во вся ве́ки.