Ирмос: Превозноси́мый отцо́в Госпо́дь пла́мень угаси́, о́троки ороси́, согла́сно пою́щия: «Бо́же, благослове́н еси́».

Превозноси́мый со Отце́м и Ду́хом Сын, Тя, Чи́стая, зело́ возлюби́, избра́в в жили́ще Себе́, Благослове́нная.

Дверь непрохо́дную зрит Тя проро́к, Мари́е Всенепоро́чная, ю́же Еди́н про́йде, Ему́же вси сла́дце пою́т: Бо́же, благослове́н еси́.

У́сты́ и мы́слию Тя, Всепе́тая, пропове́дую, веселя́ся: Бо́га бо родила́ еси́, Ему́же вси сла́дце пое́м: Бо́же, благослове́н еси́.

Неве́ста была́ еси́ Бо́жия, апо́столов похвала́, му́чеников венча́ние, красота́ преподо́бных и ра́дование вопию́щих: Бо́же, благослове́н еси́.