Ирмос: Его́же во́инства небе́сная сла́вят, и трепе́щут херуви́ми и серафи́ми, вся́ко дыха́ние и тварь, по́йте, благослови́те и превозноси́те во вся ве́ки.

По до́лгу Твое́ призыва́ем моле́ние, Бого ма́ти, к Твоему́ Сы́ну вси гре́шнии и осужде́ннии, да гее́нны хода́тайством Твоим изба́вимся.

Спору́чница бу́ди мне, Всенепоро́чная, ко Го́споду Бо́гу, егда́ на зе́млю прии́дет е́же суди́т вся́ческая, и насле́дника покажи́ мя ча́сти спаса́емых, окая́ннаго, молю́ Ти ся.

Угаси́ огнь страсте́й и пло́ти умертви́ мудрова́ние, ум просвети́, се́рдце очи́сти, и ду́шу напита́й хле́бом небе́сным, и спаси́ мя, Богороди́тельнице.

Путенаста́ви, Влады́чице, на стези́ за́поведии́ Бо́жиих мя гре́шнаго, уклони́ мое́ се́рдце на путь спасе́ния, Тя бо и́мам еди́но заступле́ние и предста́тельство.