Ирмос: Взако́не се́ни и писа́ний о́браз ви́дим ве́рнии: всяк му́жескии́ пол, ложесна́ разверза́я, свят Бо́гу; тем перворожде́нное Сло́во, Отца́ Безнача́льна, Сы́на первородя́щася Ма́терию неискусому́жно, велича́ем.

Приближа́ется, душе́, коне́ц, при две́рех суд, оста́ви дела́ сту́дная и восприими́ благо́е жи́тельство; Побо́рницу бо и́маши Богоро́дицу, от вся́каго избавля́ющу тя озлобле́ния.

Вразбо́йники мысленный впадо́х, окая́нный, тех ко́зньми ри́зы доброде́тели умовре́дно совлеко́хся, и душепа́губных ран испо́лнь, вопию́ Ти: Богоро́дице, не пре́зри мя.

Житие́ мое́ все, Нескве́рная, ле́ностне соверши́ся, и ко а́ду прибли́жихся ны́не отча́яния, но исправле́ние даждь и не оста́ви в сицево́м озлобле́нии прибега́юща к кро́ву Твоему́.

Пло́ти моея́ неможе́ние и души́ разслабле́ние, се́рдца боле́знь и ума́ уклоне́ния моего́ Тебе́ возложи́в, вопию́: даждь исцеле́ние, да похвало́ю велича́ю Тя.

Стихиры, глас третий. Подобны:Велия Креста́ Твоего́ си́ла:

Ра́дуйся, предста́тельство всех, Ма́ти Де́во, сла́во ве́рою те́плою Тя велича́ющих; ра́дуйся, похвале́ и утвержде́ние и огражде́ние ненаве́тно.

Ра́дуйся, Юнице, Тельца́ ро́ждшая непоро́чна; ра́дуйся, еди́на Преблагослове́нная; ра́дуйся, Препросла́вленная; ра́дуйся, честно́е украше́ние а́нгелов; ра́дуйся, живота́ Хода́таице, Безневе́стная Богоро́дице Мари́е.

Ра́дуйся, свеще́ неугаси́мая ми́рови; ра́дуйся, Неве́сто вседо́брая; ра́дуйся, всезлата́я и Боже́ственная Сло́ва пала́то; ра́дуйся, Отрокови́це, еди́но прибе́жище всех вопию́щих Ти «ра́дуйся».

Львов душепа́губных изми́ мольба́ми Твоими, упова́ние и предста́тельство ро́да на́шего, и путево́ждствуи́ мя к Ца́рству Вы́шнему, и зре́ти добро́ту Сы́на Твоего́, Де́во, сподо́би.