Ирмос: От но́щи у́тренююща, Человеколюбче, просвети́ молю́ся, и наста́ви и мене́ на повеле́ния Твоя́, и научи́ мя, Спа́се, твори́ти во́лю Твою́.

Ра́дуйся, всея́ тва́ри Цари́це; ра́дуйся Всенепоро́чная; ра́дуйся, наде́ждо всех к Тебе́ притека́ющих; ра́дуйся, исто́чниче чи́стый неистоща́емыя Струи́.

Ра́дуйся, светле́йшая пала́то вся руко́ю Содержа́щаго неизрече́нно; ра́дуйся, преподо́бных украше́ние и сла́во му́чеников, Нескве́рная Влады́чице.

Ра́дуйся, сто́лпе о́гненный, преводя́й Изра́иля у́мнаго в Боже́ственное упокое́ние; ра́дуйся, незаходи́маго Све́та о́блаче, Богома́ти, Отрокови́це Всепе́тая.

Спаси́ мя окая́ннаго, лю́тыми ра́нами и беда́ми разли́чными обдержи́ма всего́, и не оста́ви, Чи́стая, до конца́ бе́дствовати.