Ирмос: Возопи́х всем се́рдцем моим к Ще́дрому Бо́гу, и услы́ша мя от а́да преиспо́дняго, и возведе́ от тли живо́т мой.

Припа́даю Ти, Мари́е Нескве́рная, и с пла́чем, Богоро́дице, вопию́: изми́ злополу́чную ду́шу мою́ бу́дущаго суда́ и огня́ ве́чнующа.

Напой молений Твоих водами всеокаянную ду́шу мою́, страсте́й зно́ем опа́льшуюся, и плодоно́сну сию́ покажи́, Пренепоро́чная Влады́чице.

Освяти́ мя всего́ и просвети́, очисти́лище ве́рных, и Твоими мольба́ми Святы́я Тро́ицы дом покажи́, Отрокови́це, молю́ Ти ся.

Приста́нище Тя вем ти́хое, Богороди́тельнице Мариа́м, и из глубины́ серде́чныя вопию́: не оста́ви мя погружа́тися вра́жиими треволне́ньми.

Седален, глас шестый. Подобен:Мно́гая мно́жества:

Помысло́в сопроти́вных смуща́ет мя бу́ря и страсте́й наважде́ния в глубину́ низво́дят поги́бели окая́нную мою́ ду́шу, но уще́дри мя, Бо́га ро́ждшая, и изба́ви раба́ Твоего́ бу́дущаго преще́ния, еди́на Благослове́нная.