Ирмос: Вο глубине́ постла́ иногда́ фараони́тское всевоинство преоруже́нная си́ла, вопло́щшееся же Сло́во всезло́бный грех потреби́ло есть, препросла́вленный Госпо́дь, сла́вно бо просла́вися.

Вο гла́сех пе́сней свяще́нных хвалу́ благода́рственную по до́лгу, Богоро́дице, Тебе́ пою́, зане́же спаса́вши мя от всех, в ни́хже име́ях Тя по́мощь. Ты по Бо́зе еси́, Влады́чице, мне прибе́жище.

Вο вся́цем внеза́пнем шу́ме еди́но и́мя Твое́ глаша́ю и стра́ха избавляюся: сицева́ благода́ть Твоя́ и толи́ка безме́рна по́мощь, к не́йже всяк притека́яй, Влады́чице, от ну́ждных свободи́ся.

Впады́й в молву́ искуше́ний внегда́ Тя взыска́х, не ско́ро ли бу́рю потреби́ла еси́, ум мой умири́ла еси́ и от наве́та вся́каго исхити́ла еси́? Те́мже благословля́ю Тя и воспева́ю си́лу Твою́.

Отча́ян мно́жеством лю́тых, воспла́ках и обрето́х Тя предзащище́ние, ну́ждных изыма́ющу; предваря́еши непреста́нно, заступле́ние су́щи мне, те́мже благословля́ю Тя, Влады́чице, и воспева́ю си́лу Твою́.