Ирмос: Седмери́цею пещь халде́йскии́ мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: «Отроцы благослови́те, свяще́нницы воспо́йте, лю́дие превозноси́те во вся ве́ки».

Изба́ви вся́каго злых мя обы́чая, да́руй ко Го́споду обраще́ние непоро́чно и чистоте́ присвое́ние; добро́тами превысо́кими, Де́во, целому́дренно мое́ сотвори́ житие́, и всех благи́х пода́ждь ми хода́тайство, да славосло́влю Тя во вся ве́ки.

Яже Свет Бо́жий неизрече́нный челове́ком возсия́вшая, просвети́, Дево́, душе́вная моя́ чу́вства, тьму прогоня́ющи от мене́ лю́таго уны́ния; возжзи́ в се́рдцы мое́м огнь любве́ к Сы́ну Твоему́, и сла́дкаго весе́лия Его́ испо́лни мя во вся ве́ки.

Всех до́брых ви́ды мя украси́, Влады́чице, ра́дости духо́вныя раба́ Твоего́ испо́лни, кру́гом доброде́телей увенча́й, вся́каго сподо́би даро́в хода́тайства, и Ца́рства Небе́снаго прича́стника мя покажи́, а́ще и па́че досто́инства моего́ испро́шено есть.

Неуде́ржным ма́нием, невла́емым же стремле́нием к ше́ствию доброде́тельну посыла́тися невозбра́нно благопоспе́шствуи́, и к су́щим дале́че ми простира́тися, за́дняя вся забыва́ющу, и те́плое покая́ние и моли́твы пода́ждь, да любо́вию пою́ Тя во ве́ки.