Ирмос: Си́лою Креста́ Твоего́, Христе́, утверди́ мое́ помышле́ние, во е́же пе́ти и сла́вити тридне́вное Твое́ воскресе́ние.

Ра́дуйся, ца́рствующих поможе́ние тве́рдое и одоле́тельное; ра́дуйся, Нетле́нная Влады́чице, Всесвята́я Ма́ти Де́во.

Ра́дуйся, во́инствующих кре́пкая и Боже́ственная де́рзосте и держа́во; ра́дуйся, сла́во любо́вию и ве́рою несумни́тельною пою́щих Тя.

Всечестна́я а́нгелов ра́досте, ра́дуйся, Благослове́нная; ра́дуйся, Пресвята́я; ра́дуйся, ве́ры воскресе́ние и пре́лести разоре́ние.

Всесве́тлая Вы́шняго ски́ние, ра́дуйся, Де́во Пресла́вная; ра́дуйся, царе́й похвале́ и му́чеников укрепле́ние.