Ирмос: Колесницегони́теля фарао́ня погрузи́, чудотворя́й иногда́ Моисе́йскии́ жезл, крестообра́зно порази́в и раздели́в мо́ре, Изра́иля же беглеца́ пешехо́дца спасе́, песнь Бо́гови воспева́юща.

Гное́ние души́ моея́ изсуши́ и язв стру́пы де́тельным врачевство́м Сы́на Твоего́, Всечи́стая; на Тя бо наде́жду всю мою́ возложи́х, и Тя Хода́таицу предлага́ю Твоему́ Сы́ну и Бо́гу на́шему.

Неради́во и ле́ностно житие́ мое́ все ижди́х, Влады́чице, блу́дный аз; в себе́ же прише́д, к Твоему́ притека́ю покро́ву и ве́рою Ти зову́: спаси́ мя мольба́ми Твоими, Пречи́стая.

Па́че песка́ вои́стинну исчисля́еми беззако́ния моя́ и греси́, и́хже безсту́дно соде́ях и себе́ оскверни́х, преоби́дев е́же по о́бразу, окая́нный; но Ты, я́ко Многоблагоутро́бна, спаси́ мя.

Прибега́юща ны́не к Тебе́ со слеза́ми, мно́гим же воздыха́нием и се́рдца ско́рбию, не пре́зри, молю́ся, но Твоим хода́тайством в день суда́ Сы́на Твоего́ умоли́, я́ко да изба́влюся му́ки.