Ирмос: Превозноси́мый отце́в Госпо́дь пла́мень угаси́, о́троки ороси́, согла́сно пою́щия: «Бо́же, благослове́н еси́».

Похвало́ всеми́рная и очисти́лище, прегреше́ний ми оставле́ние пода́ти умоли́ благоутро́бнаго Сы́на Твоего́, и живо́т ве́чный.

То́ки слез ми да́руй, Всепе́тая, я́ко да ве́чную и стра́шную угашу́ му́ку, и пою́ Сы́ну Твоему́: Бо́же, благослове́н еси́.

На глаго́лы усте́н моих и слез пото́ки призре́вши, Чи́стая, ско́рби измени́ души́ моея́ в и́стинное весе́лие Сы́на Твоего́.

Благодарова́теля Бо́га нам ро́ждши, Того́ уми́лостиви ма́терними мольба́ми, Нескве́рная, да уще́дрит Тобо́ю хва́лящияся.