Ирмос: Водрузи́вый на ничесо́мже зе́млю повеле́нием Твоим и пове́сивый неодержи́мо тяготе́ющую, на недви́жимей, Христе́, ка́мени за́поведеи́ Твоих Це́рковь Твою́ утверди́, еди́не Бла́же и Человеколю́бче.

Прему́дрости воипоста́сныя Ма́ти была́ еси́, Бо́га и Сло́ва, Мари́е Нескве́рная, Его́же, Чи́стая, умоли́, ка́плю стра́ха Бо́жия иска́пати се́рдцу моему́, я́ко да испо́лнюся Боже́ственнаго разуме́ния.

Ка́пли дожде́вныя зе́млю утучня́ют и плод прозяба́ти, Чи́стая, подают, аз же же́стоко и неболе́зненно се́рдце име́яй, ника́коже умиля́юся.

Невеще́ственно мы́сленным ум бесе́дуяй, я́ко исто́чницы влече́т слез струи́; мой же, о Богома́ти, ум земли́ пригвожда́емь, многоча́стныя по́мыслы стяжа́, и по достоя́нию изтупля́ется.

Ми́ро доброде́тели о́бразы четы́рьми, Богома́ти, изя́щно состроя́емо быва́ет: му́дростию и му́жеством душе́вным, пра́вдою Боже́ственною и целому́дрия чистото́ю, сих же аз лиши́хся.