Ирмос: Превозноси́мый отце́в Госпо́дь пла́мень угаси́, о́троки ороси́, согла́сно пою́щия: «Бо́же, благослове́н еси́».

Кто ин согреши́ я́коже аз, Всепе́тая? Ум греху́ повину́х, те́ло оскверни́х и вся чу́вствия омрачи́х, окая́нный.

Мене́ всеблу́днаго, мене́ всеокая́ннаго, уще́дри, Влады́чице, и даждь ми оставле́ние пре́жних согреше́ний, да любо́вию Тя сла́влю.

Со́нными привиде́ньми враг, Богоневе́стная, прельща́яй мя, ну́дит к паде́жу чрез мне́ние, его́же вселука́вства, Богоро́дице, свободи́ мя.

Жезло́м состра́стия, па́лицею покро́ва Твоего́ уте́ши и мене́, Чи́стая, и еле́ом Божественнаго Твоего́ благоутро́бия нама́сти главу́ мою́.